3 gjëra që nuk duhet ti veproni gjatë Haxhit

Haxhi është një prej pesë shtyllave të Islamit dhe përbën një udhëtim të shenjtë që kërkon përgatitje shpirtërore dhe sjellje të denjë. Për të përfituar shpërblimin e plotë dhe për të ruajtur vlerën e kësaj adhurimi madhështor, është e rëndësishme që haxhiu të shmangë disa veprime që bien ndesh me etikën dhe rregullat e Haxhit. Më poshtë janë tre gjëra që nuk duhet të bëhen gjatë Haxhit:

1. Grindja dhe fjalët e pahijshme

Allahu i Lartësuar ka ndaluar qartë fjalët e pahijshme, ofendimet dhe debatet e kota gjatë kohës së Ihramit. Në Kuran thuhet:

“…Kush merr përsipër të bëjë Haxhin, le të mos afrohet me bashkëshorten, as të bëjë mëkate e as të grindet gjatë Haxhit…” (Bekare, 197)

Grindja jo vetëm që prish qetësinë shpirtërore, por mund të ndikojë edhe te të tjerët. Haxhi duhet të jetë një kohë për durim, reflektim dhe afrim me Allahun, jo për nxitje zemërimi apo fjalë të shëmtuara.

2. Krenaria dhe përçmimi i të tjerëve

Përulësia është një nga cilësitë më të dashura te Zoti, sidomos në Haxh, ku të gjithë janë të veshur njësoj dhe qëndrojnë në të njëjtat vende, pa dallim pozite apo pasurie. Krenaria, vetëmburrja dhe përçmimi i të tjerëve janë sjellje të dënueshme që mund të shkatërrojnë shpërblimin e Haxhit. Profeti Muhamed (a.s.) ka thënë:

“Nuk do të hyjë në Xhenet ai që ka në zemrën e tij krenari sa një grimcë.”

Haxhi është udhëtimi i barazisë dhe i vëllazërisë; çdo lloj arrogance bie ndesh me frymën e tij.

3. Mosrespektimi i rregullave të Ihramit

Ihrami është gjendje adhurimi me kufizime të veçanta që fillon me nijetin për Haxh ose Umre. Gjatë kësaj kohe, haxhiut i ndalohen disa gjëra të zakonshme si: prerja e thonjve, rruajtja e qimeve, veshja e rrobave të qepura për meshkujt, përdorimi i parfumeve, gjuetia dhe marrëdhëniet bashkëshortore. Mosrespektimi i këtyre rregullave mund ta dëmtojë vlefshmërinë e Haxhit dhe kërkon kompensim (fidje). Haxhiu duhet të jetë i kujdesshëm dhe i ndërgjegjshëm për rregullat që ka pranuar, duke i ruajtur me përpikëri si shenjë adhurimi ndaj Allahut.