Agjerimi i 6 ditëve të Shewalit

Pas përfundimit të muajit të bekuar të Ramazanit, Allahu i jep mundësi robërve të Tij që të vazhdojnë në adhurim përmes agjërimit të gjashtë ditëve të Shewalit. Ky është një adhurim që sjell shpërblime të mëdha dhe është shenjë e vazhdimësisë në rrugën e devotshmërisë.

Profeti Muhammed (paqja dhe mëshira e Allahut qofshin mbi të) ka thënë: “Kush e agjëron Ramazanin dhe më pas e pason atë me gjashtë ditë nga Shewali, është sikur ka agjëruar tërë vitin.” – Muslimi, nr. 1164

Ky hadith dëshmon për madhështinë e këtij agjërimi dhe vendin që zë në fenë islame. Ky agjërim vullnetar nuk është pjesë e obligimeve, por për nga vlera, ai është ndër veprat më të dashura për besimtarët që synojnë kënaqësinë e Zotit të tyre. Shpjegimi i dijetarëve Imam Neveviu (Allahu e mëshiroftë) në komentet e tij mbi këtë hadith thotë: “Dijetarët e shpjegojnë këtë si një shpërblim dhjetëfish për çdo ditë agjërimi. Ramazani ka tridhjetë ditë dhe shpërblimi i tij është si treqind ditë; ndërsa gjashtë ditët e Shewalit janë si gjashtëdhjetë ditë. Kështu, në total është sikur ka agjëruar 360 ditë, që përbën një vit të plotë.” – Sherhu Sahih Muslim, 8/56

Ndërsa imam  Ibn Rexheb  el-Hanbeli (Allahu e mëshiroftë) thotë: “Agjërimi pas Ramazanit është sikur të përforcojë agjërimin e detyrueshëm dhe të përsosë mangësitë që mund të kenë ndodhur gjatë muajit të shenjtë. Ashtu si namazi pas farzit plotëson të metat e namazit farz, edhe agjërimi vullnetar mbush zbrazëtirat e agjërimit të Ramazanit.” – Letaifu-l-Me’arif, fq. 388 Rregullat dhe dispozitat 1. Vullnetar dhe shumë i rekomanduar – Nuk është obligim, por kushdo që e kryen, ka shpërblimin e agjërimit të një viti të plotë. 2. Agjërohet vetëm pas përfundimit të Ramazanit – Për të fituar shpërblimin e përmendur në hadith, duhet që fillimisht të jetë agjëruar Ramazani plotësisht. 3. Lejohet të jenë ditë të ndara ose të njëpasnjëshme – Nuk ka ndonjë urdhër specifik për mënyrën e agjërimit. Dijetarët lejojnë që të shpërndahen përgjatë muajit. 4. Preferohet që paraprakisht të kompensohen ditët e humbura të Ramazanit – Për gratë që kanë pasur ndalesa për shkak të menstruacioneve apo për ata që e kanë ndërprerë agjërimin me arsye të justifikueshme, është më e sigurt që së pari të kryejnë detyrimin dhe më pas të angazhohen me agjërimin vullnetar. Dobi dhe mësime • Vazhdimësi në adhurim – Një prej shenjave të pranimit të një adhurimi është pasimi i tij me një tjetër. Nëse pas Ramazanit njeriu vazhdon me agjërim, kjo është shenjë e mirë për sinqeritetin dhe përkushtimin e tij.

• Stërvitje shpirtërore – Agjërimi e mbron njeriun nga dëshirat e ulëta, e forcon vullnetin dhe e ndihmon në ruajtjen e qëllimit të devotshmërisë që është përfituar gjatë Ramazanit.

• Përkujdesje ndaj veprave vullnetare – Kjo tregon se besimtari nuk mjaftohet me obligimet, por kërkon më shumë afrim te Allahu përmes veprave shtesë. Përfundim Agjërimi i gjashtë ditëve të Shewalit është një mundësi për çdo besimtar që dëshiron të qëndrojë në rrugën e devotshmërisë edhe pas muajit të Ramazanit. Ai përfaqëson një qëllim të lartë – atë të vazhdimësisë në adhurim dhe përkushtim ndaj Allahut.

Allahu na e bëftë të lehtë për ta shfrytëzuar këtë mundësi dhe për të qenë prej atyre që e mbushin vitin e tyre me adhurime dhe sinqeritet.